ပုဂံရောက်ရင် စားသင့်တဲ့ မြန်မာဘူဖေး အညာထမင်းဆိုင်

ပုဂံသွားတဲ့အခါ ပုဂံကရှေးဟောင်းဘုရားတွေရဲ့ ဖြစ်တည်မှု ဖြစ်ပေါ်လာပုံတွေကို လေ့လာရင်း တွေးတောရင်းနဲ့တင် ပုဂံခရီးလေးက မပြည့်စုံသေးဘူးနော်။ ပုဂံရောက်တုန်း အညာစာ အညာအရသာစစ်စစ်ကို စားသုံးနိုင်မဲ့ အခွင့်အရေးလေးကိုလည်း လက်မလွှတ်သင့်ဘူးလေနော်။ပုဂံမှာ ဆိုင်တွေကအများကြီးဆိုတော့ ဘယ်ဆိုင်စားရမလဲ စဉ်းစားရခက်ပြန်ရောပေါ့။ 

ဒါဆိုရင်တော့ အညာအရသာစစ်စစ်ကို လက်ရာကောင်းကောင်းနဲ့ စားလို့ရနိုင်မဲ့ ဆိုင်ကို ညွှန်းချင်ပါတယ်။ဒီဆိုင်လေးက မြန်မာအစားအစာဘူဖေးဆိုင်ဖြစ်ပြီး ဆိုင်နာမည်လေးက ရွှေမြန်မာ ၂ တဲ့ ။မြန်မာအစားအစာဘူဖေးအတွက် တယောက်ကို ၃၅၀၀ ဝန်းကျင်လောက်ကျသင့်ပါတယ်။ 

ဆိုင်လေးကအာနန္ဒာဘုရားနားမှာဖွင့်ထားတာဖြစ်ပြီး လူအယောက် ၅၀ လောက်တစ်ပြိုင်တည်းအေးဆေးစားလို့ရတဲ့ဆိုင်လေး။ မြန်မာဘူဖေးဆိုတော့ လိုအပ်တဲ့ ဟင်းတွေ ထမင်းတွေကို စားပွဲထိုးလေးတွေက လိုက်ပြီးဖြည့်ဆည်းပေးရတာဆိုတော့ လူအရမ်းများများဝင်တဲ့ဆိုင်ဆိုရင် ဧည့်ဝတ်မကျေတတ်ကြဘူးဆိုပေမဲ့ ဒီဆိုင်လေးကတော့ အရမ်းဧည့်ဝတ်ကျေရှာပါတယ်။ 

ဒီဟာလေးကတော့ ပုဂံစာလေးပေါ့။ ပုန်းရည်ကြီးလေးနဲ့ ဆီစိမ်းလေးကို စိမ်ထားတာလေး ။ အရသာကဘာနဲ့မှမလဲနိုင်အောင်ဆိမ့်နေတာဆိုတော့ ထမင်းစားဝင်ချက်က တလုတ်ပြီးတလုတ်ကို ဆက်နေတော့တာပါဘဲ။

ဒါလေးကတော့ မျှစ်နဲ့ တဇောင်းခါးနဲ့ ရောချက်ထားတာလေး အညာစာစစ်စစ်ပေါ့လေ။ တဇောင်းခါးရဲ့ ခါးသက်သက် မျှစ်ရဲ့ချိုတဲ့အရသာနဲ့ပေါင်းစပ်ထားတဲ့အညာချက်ကလေးဆိုတော့ ဘယ်လို့တောင်ပြောပြရမှန်း တောင်မသိတော့ပါဘူးနော် အရသာကကောင်းလွန်းလို့။

ဒါကတော့မရမ်းသီးချက်လေးပေါ့နော်။ စားကောင်းလွန်းလို့တောင်းရတာအခါခါပေါ့ ။အညာစာဆိုတော့ဆီကတော့နည်းနည်းများတာပေါ့။ ဒါပေမဲ့ စားကောင်းချက်ကတော့ ရှယ်ဘဲ ။ မရမ်းသီးရဲ့အချဉ်အရသာကလဲအနေတော်ပဲ ပဲဆီရဲ့ဆိမ့်တဲ့အရသာနဲ့ ငရုတ်သီးစိမ်းလေးတွေခပ်ထားတော့ ခပ်စပ်စပ်လေးဆိုတော့ ထမင်းမြိန်ချက်ဘဲ။

အရွက်သုပ်အရံဟင်းဆိုပြီးတော့ အထင်တော့မသေးလိုက်နဲ့။ အညာပဲမှုန့်စစ်စစ်နဲ့ ဆီချက်မွှေးမွှေးလေးရယ်၊ အရွက်ကလတ်ဆတ်ပြီးချိုတဲ့အရသာတွေပေါင်းစပ်ထားတာဆိုတော့ အသီးအရွက်မကြိုက်တဲ့သူတွေတောင်လျှာလည်သွားနိုင်တဲ့ အရံဟင်းလေးပေါ့။

အညာဆိုတဲ့အတိုင်းပဲနှပ်ကလေးကတော့မပါရင် မဖြစ်ဘူးနော်။ ပဲပြားလေးတွေကိုပုံမပျက်ပဲနှပ်ထားတာက တကယ်ဆရာကျတယ်ဗျာ ပဲကချိုတဲ့အရသာရယ် ၊ ဆိမ့်တဲ့အရသာရယ်ကလေ လျှာပေါ်စွဲကျန်ခဲ့စေတာအမှန်ပါ။ အချိုမှုန့်အရသာစွဲကျန်ခဲ့တာမဟုတ်ဘူးနော် သဘာဝအရသာ ကွက်တိပဲ။ 

ဝက်သားဟင်းချက်လေးပါ။ သူလဲကောင်းနေရောပဲ ။ခရမ်းချဉ်သီးနဲ့အညာစတိုင်ချက်ထားတာဖြစ်ပြီး အဆီအခေါက်လေးတွေကနူးအိပြီး ခရမ်းချဉ်သီးရဲ့ ချဉ်ချိုအရသာလေးကိုပေါင်းစပ်ထားတာများ စားလိုက်တိုင်းကို ရှိသမျှအမျိုးအကုန်မေ့ပဲဗျာ။  အသားမှာဝက်ဆိုတဲ့အတိုင်း ဝက်သားအညာစတိုင်ချက်လေးကို တော်တော်လေးကြိုက်မိတဲ့ဟင်းလေး။

ဆိတ်သားနှပ်ချက်လေးပါ ။ကိုယ်တွေကဆိတ်သားဆိုရင်ကုလားချက်ပဲကြိုက်တာလေ ။မဆာလာနံသင်းသင်းလေးနဲ့ပေါ့ ။အညာစတိုင်ချက်ထားတာဆိုတော့ကိုယ်အကြိုက်မဟုတ်လောက်ဘူးထင်ပြီး ဦးစားပေးမမြည်းခဲ့ဘူးလေ။ ဘယ်ဟုတ်မလဲ။အထင်နဲ့ အပြင်နဲ့ကလွဲချက် ။စမ်းစားကြည့်လိုက်တော့ ဆိတ်သားဆိုတာလေနူးပြီး ချိုနေတာပဲ။ အစတုန်းကတော့မဆာလာမပါရင်ညှီမယ်ထင်နေတာ ၊ဆိတ်ဆိုတာညှီတဲ့အမျိုးမလား ။တစက်ကလေးတောင်မညှီတာအံရော။ ဟင်းချက်လက်ရာကတော့ လက်ဖျားခါလောက်တယ်။

ကြက်သားကိုလဲခရမ်းချဉ်သီးနဲ့ရောချက်ထားတာဗျာ။ ကိုယ်တွေက ခရမ်းချဉ်သီးဆိုရင် အစိမ်းသုတ်လောက်ပဲကြိုက်တာလေ။ အသားဟင်းထဲများ ခရမ်းချဉ်သီးရောချက်ရတယ်လို့ ၊ကြံကြံဖန်ဖန်ချက်တယ်ဆိုပြီး အပြစ်တင်စောနေတာ ။ဘယ်မဟုတ်မလဲ ခရမ်းချဉ်သီးကြက်သားအနှစ်နဲ့လူးစားကြည့်လိုက်တာ ထမင်းတစ်ပန်ကန်ဘယ်လို့ကုန်သွားမှန်းတောင်မသိလိုက်ဘူးဗျာ။

ဒါလေးကတော့ ထမင်းစားပြီးရင် တည်ခင်းပေးတဲ့ လက်ဖက်လေးပါ။ လက်ဖက်လေးကတော့ သာမန်ပါဘဲ။ အရမ်းကြီးတော့ မထူးကဲပါဘူး။ ဒီဆိုင်လေးကတော့ ပုဂံရောက်လို့ အညာအရသာစစ်စစ်တွေကိုမှ စားသုံးချင်တဲ့ သူတွေအတွက် တကယ့်ကို ဆိုင်ကောင်းလေးတစ်ဆိုင်ဆိုတော့ ပုဂံကိုလည်လည်ရောက်ခဲ့ရင် ဒီဆိုင်လေးကို သွားဖြစ်အောင် သွားခဲ့ကြပါလို့။
..
ဆရာ‌‌စောသာထူးစေး